Kawatan og kable sikop

Nadakpan ang usa sa upat ka suspetsado sa pagpangawat sa mga cable wire sa buhatan sa Innove/Globe Telecom company nga nagbase sa barangay Matab-ang siyudad sa Toledo niadtong Huwebes sa gabii.

Ang usa sa upat ka mga suspek nga nadakpan giila sa kapolisan nga si Sobener Reyes, 24-anyos, molupyo sa nahisgutang lugar.

Ang roving guard sa maong kompaniya nga si Jhuny Samoranos Paraon, hingkod ang panuigon maoy nakadakop sa suspek sa akto nga nangawat sa mga cable wire kauban ang laing tulo ka mga lalaki.

Matud ni PO3 Lorenzo Gutang sa Toledo City Police dihang nahinabi sa Banat News nga abtik nga nakasibat ang tulo ka mga kauban ni Reyes hinungdan nga wala na kini maabti.

Na-recover gikan sa posisyon sa suspek ang 50 ka parisan sa mga copper cable wires nga gibana-banang dunay 40 metros ang gitas-on.

Ang suspek nagtingkagol na karon sa detention cell sa Toledo City Police ug pormal na kining gipasakaan og kasong pagpangawat sa Toledo City Prosecutors Office niadtong adlaw'ng Biyernes.

Matud ni PO3 Gutang gi-estrikto na ang pagbantay sa palibot sa maong kompaniya sa maong lugar tungod kay kanunay lang kining mabiktima sa pagpangawat sa mga cable wires.

Padayon pa ang gihimong follow-up operation sa kapolisan pagtumbok sa nahabiling mga suspek nga nakaeskapo.