Nag-ayo og gripo gipatay

Usa ka lalaking nag-ayo sa gripo sa sulod sa ilang pansayan sa Soong 1, barangay Mactan, dakbayan sa Lapulapu sa miaging tungang gabii ang gipusil ug namatay.

Ang namatay mao si Ryan Milan, 26, lumolupyo sa maong dapit samtang gitumbok nga mipusil kaniya mao si Junrey Cacha, taga sitio Buyong sa barangay Maribago sa maong dakbayan.

Si SPO1 William Humoc sa homicide section sa kapolisan sa maong dakbayan nga nahinabi sa Banat News miingon nga ang suspetsado kalit lang misulod sa panimalay sa biktima ug naabtan kini diha sulod sa kasilyas dayong kalit gipusil makadaghang higayon.

Nakabaton og mga samad pinusilan ang biktima sa ulo ug uban pang bahin sa kalawasan nga maoy nakaingon sa hinanaling kamatayon niini.

Wala pa matumbok sa kapolisan kung unsay motibo sa pagpusil samtang daling nakaeskapo ang mamumuno.