Tigulang gisungog naghikog

Naghikog patay ang usa ka 84 anyos nga tigulang human kini giingong gisungog-sungog sa mga estambay nga dakpon sa mga polis tungod sa mga pasangil nga pagpamaligya og gidiling drugas niini didto sa barangay Looc, barangay Poblacion, lungsod sa Argao niadtong Martes sa alas 4:30 sa kaadlawon.

Ang biktima giila sa kapolisan nga si Godofredo Zamora, 84, ulitawo ug molupyo sa Media-Poblacion sakop sa maong lungsod.

Apan didto na sa gawas nga bahin sa pinuy-anan sa iyang pag-umangkon sa barangay Looc nakit-an ang patay’ng lawas sa biktima nga nagbitay na ilawom sa punoan sa mangga nga nagdiwalwal ang dila ug wala nay kinabuhi human naghikog kini ginamit ang pisi nga nylon nga gihigot sa iyang liog ug gihigot sa punoan sa mangga.

Matud ni PO1 Eduardo Semilla sa Argao Police Station sa dihang nahinabi sa Banat News ang pag-umangkon sa biktima nga si Joan Marie Rufo maoy nakakita sa nagbitay nga patay’ng lawas sa biktima sa punoan sa mangga dihang migawas kini sa pinuy-anan nianang pagka alas 5 sa buntag aron sa pagtuman sa sugo sa lawas.

Subay sa gihimong imbestigasyon sa kapolisan ang biktima nahiabot sa maong lugar upat ka adlaw na ang milabay ug sigun sa mga tabi-tabi sa mga silingan nga kanunay sungog sungogon ang biktima sa mga estambay sa maong lugar sa wala pa ang hitabo.

“Hadlok hadlokon kuno ni sa mga estambay, hala dakpon ka sa pulis kay namaligya ka og shabu,ilaha ra gud siguro to nga sulog sulog,” dugang asoy ni PO1 Semilla.

Gituohan usab sa kapolisan nga posibleng nasakit og nervous breakdown ang biktima hinungdan nga nakahunahuna kini sa paghikog.

Kumbinsedo ang mga tagtungod sa biktima nga walay foul play ang kamatayon niini.