Taxi driver mitulis sa iyang pasahera

Gipangita na karon sa kapolisan sa dakbayan sa Sugbo ang usa ka taxi driver nga mitulis sa iyang pasahero mga alas 4 pasado sa hapon niadtong Martes diha duol sa Cokaliong corner Reclamation area, barangay Carreta.

Si SPO3 Ernesto Caballero sa Waterfront Police Station nga gikahinabi sa Banat News miila sa biktima nga si Jane Villacastin, 25, dalaga, taga dalan Banawa, barangay Guadalupe.

Samtang ang gipangita pa ug wala mailhing  drayber nagmaneho kini sa RJ Taxi apan walay plate number nga nakuha ang kapolisan hinungdan nga ilang gipalawman na og maayo ang pag-imbestigar niini.

Matud pa ni SPO3 nga ang biktima gihatod na lang sa mga polis sa Mabolo Police Station diha sa ilang buhatan human usab kini gitulis sa drayber nga gitionan sa dala niining hunting knife.

Sumala pa nga ang biktima miasoy nga misakay siya sa RJ Taxi gikan sa Banawa niadtong Martes sa hapon apan sa paghiabot nila sa nahisgutang lugar ang drayber kalit lang mipahunong sa iyang gimanehong taxi ug mipasangil nga motubag lang kini sa sugo sa iyang lawas apan pipila ka gutlo sa pagbalik ang biktima nga diha sa front seat gitionan sa hunting knife ug nagkanayon nga “Naog day naog day ibilin imong bag”.Gumikan sa kalisang sa biktima walay nahimo kun dili ang pagsunod sa mando sa drayber hinungdan nga gihatag niini ang iyang shoulder bag nga adunay mga sulod nga importanteng butang, cash money nga mokabat sa P2,900, duha ka cellphone nga mokantidad sa P8,500.