Affidavit giluwatan vs nanglungkab VK

Miluwat na sa ilang affidavit batok sa mga operator og karera diha sa buhatan sa Talisay City Legal Officer ang duha ka tanod sa barangay Lagtang ug ang usa ka caretaker sa barangay hall nga gipasanginlang milungkab sa video karera nga nangasakmit.

Si Kapitan Celiapo Cabuenas sa maong barangay sa pakighinabi sa Banat News kagahapon mibutyag nga ang duha ka tanod nga si Julius Econas ug Nelson Juezan ug ang caretaker sa barangay hall nga si Romeo Pineda miluwat kagahapon sa ilang affidavit batok sa mga giingong karera operators nga si Menchulin Dagode, Macario Cabuenas, paryente sa kapitan ug ang magtiayong Desiree ug Faustino Rabadon.

Silang Econas ug Juezan mitumbok nila ni Dagode, Cabuenas ug sa magtiayong Rabadon nga misulod sa barangay hall nga may kuyog nga  mga tawo nga milungkab sa mga video karera nga nasakmit ug mikuha sa central processing unit (CPU) ug mga sensilyo nga sulod sa mga makinang pasugalan.

Niadtong milabay’ng adlaw tulo ka makinang pasugalan ang nasakmit sa mga opisyal sa barangay ug duha niini ang giingong naablihan nilang Dagode, Cabuenas, ug mga Rabadon ug nakuhaan og mga CPU ug mga sensilyo.

Kahinumduman usab nga ang mga tanod sa barangay mitaho ngadto sa kapitan nga diha moagi sa bintana sa barangay hall ang mga  suspetsado gamit ang damba aron makasulod kini.

Apan ang maong pasangil gihimakak ni Dagode.

Dugang sa kapitan nga si Dagode mipasangil kang Pineda nga maoy nag-abli kanila aron sila makasulod apan si Pineda mihimakak usab sa maong pasangil.