Gisuportahan sa Hunta Probinsyal sa Sugbu ang lakang sa Department of Health (DOH)-7 nga pabutangon og menu sa nagkadaiyang klase sa mga tambal ang mga drugstores.
Kini human napanglantawan sa mga sakop sa Hunta probinsyal nga sa umaabot nga mga adlaw kadaghanan dili na unya makapalit sa mga gikinahanglanon nga tambal tungod sa nagpadayon ang pagsaka sa presyo sa mga branded nga mga medisina.
Ang Department of Health mimando ngadto sa mga drugstores sa tibuok Central Visayas nga mopakita og menu sa ilang mga kustomer aron dunay kapilian subay sa maabot sa ilang kuwarta ubos sa gi-prescribe nga “generic name.”
Nunot niini niumol og resolusyon si Bokal Victor Maambong nga nagsuporta sa maong lakang sa DOH-7.
“The medicine menu program aims to energize the selling value of inexpensive yet potent drugs available in the local market, and this will also promote the practice of asking for the menu,” nagkanayon ang unod sa maong resolusyon.