Babayeng kawani sa munisipyo gipatay

Gipusil patay sa wala pa mailhing mga suspek ang usa ka babaye nga kawani sa munisipyo sa lungsod sa Tuburan nga naninda atol sa gipahigayong disko sa kapistahan sa barangay Alegria lungsod sa Tuburan niadtong Domingo sa alas 12:30 sa kaadlawon.

Ang biktima giila sa kapulisan nga si Elma Pasaylo, 39, molupyo sa nahisgutang lugar ug casual employee sa accounting section sa lungsod sa Tuburan.

Subay sa imbestigasyon sa kapulisan, ang biktima naninda sa gawas nga bahin sa diskohan nunot sa kapistahan sa ilang lugar niadtong tungura dihang kalit lang giduol sa duha ka wala mailhing lalaki ug ang usa armado og kalibre .45 pistola dayong diretso og pamusil sa biktima.

Ang biktima nakaangkon og samad pinusilan sa tuo nga bahin sa iyang nawong ug ang buto sa armas maoy nakapahunong sa disko ug pagkatibulaag sa mga tawo sa sulod ug gawas nga bahin sa diskohan.

Ang mga mamumuno yano ra kaayong nisagol sa mga tawo nga nag-iyahay og panalagan.

Daling gidala sa Tuburan District Hospital ang biktima apan gideklarar kini sa mga doktor nga dead on arrival (DOA).

Matod ni PO1 Pablo Arnoco sa Tuburan Police dihang nahinabi sa Banat News love triangle ang gitutukan nga motibo sa nagpadayong imbestigasyon.

Ang patay'ng lawas sa biktima kasamtangan karong gihaya sa health center sa maong lungsod samtang gitakdang ipa-ubos sa autopsy.