Utangan gituok sa tigpatanto

Natanggong sa detention cell sa dakbayan sa Talisay ang usa ka lalaking tigpatanto human siya pasanginling mituok sa usa ka tindera og isda utangan kaniya ug gikataho nga ang suspetsado nagpabuto og pusil niadtong Sabado sa hapon sa sitio Ratan, barangay Tanke, dakbayan sa Talisay.

Ang suspetsado giila sa mga polis nga si Bernard Liu, 46-anyos residente sa maong barangay.

Ang biktima mao si Cresilda Racaza, 32, residente usab sa maong lugar kinsa daling nangayo og panabang sa konsehal sa barangay nga si Leo Cabalan.

Si Police Inspector Rolando Ong maoy duty officer niadtong Sabado  sa pakighinabi niini sa Banat News mibutyag nga si Racaza ang adunay utang kang Liu ug tulo na kini ka adlaw nga wala makadata sa utang.

Matud ni Ong nga si Liu kinsa giingong nakainom ang miimbitar kang Racaza nga mag-istorya usa sila sa daplin sa baybayon ug didto gipaningil na usab sa suspetsado ang biktima apan wala kini mobayad.

Gikataho nga sa kasuko ni Liu hinungdan nga gituok niini si Racaza.

Si Racaza ang mikisi-kisi tungod kay naningkamot kining makabuhi ug dihang nakabuhi na kini dali kining midagan ug naatol nga nasugatan niini si Cabalan.

Human mosumbong si Racaza kang Cabalan ang duha nagkuyog sa pag-adto sa nahimutangan ni Liu apan giingong nakita sa duha nga ang suspetsado nagpasalba og pusil duha ka higayon.

Si Cabalan ang daling nangayo og ayuda sa mga polis ug si PO1 Ian Boyet Nuique ang daling miresponde niini  ug  tanod sa barangay nga si James Cabigon.

Si Liu ang nasikop apan walay nakuhang armas ang mga misikop kaniya.