NBI mosusi sa hulga kang Cortes

Hatagan og pagtagad sa National Bureau of Investigation (NBI) ang tinguha sa konseho sa dakbayan sa Mandaue nga paghimo’g imbestigasyon sa gialegar nga planong pagpapatay kang Mayor Jonas Cortes.

Kini gikan ni NBI- 7 Investigator Rey Puno nga nahinabi sa Banat News kagahapon apan matud pa niya nga wala pa mahidangat sa ilang buhatan ang resolusyong gipangamahanan ni Konsehal Emiliano Rosal.

Si Atty. Ernesto Macabare, executive officer sa NBI 7 miingon nga mohimo sila og evaluation sa maong resolusyon aron masusi ang maong hulga.

Ang resolusyon ni Rosal giaprobahan sa konseho nga nag-awhag kang NBI 7 Regional Director Medardo Delimos sa pagpalawom sa imbestigasyon.

Kahinumduman nga dunay alegasyong gi-hire sa presidente sa Mandaue City College nga si Dr. Paulus Maraie Cañete ang usa ka police asset aron patyon ang mayor inig kahuman og kawat sa mga dokumento sa MCC ug pagpatay sa mga guwardiya niini.

 “The alleged plot to kill the city’s top executive may also happen to any of the city officials and should be verified because this is distasteful to the peaceful and law abiding Mandauehanons,” asoy pang Rosal sa iyang resolusyon.

Subay sa alegasyon ni Danilo Cabahug nga gi-hire siya ni Cañete bugti sa kwartang gipasalig ngadto kaniya, apan wala masayod si Cañete nga usa siya ka police asset maong iya kining gipahibalo ngadto sa kapolisan.

Gipanghimakak  ni Cañete ang maong pasangil ug nagtuong na-frame up siya ug nisumbalik sa pagpasaka og kiha batok sa mga polis ngadto sa Visayas Ombudsman tungod sa pagbutang-butang kaniya og salaod ug ingon man iligal nga pagdetiner sa mga kauban niini niadtong adlaw sa kapistahan sa patron sa dakbayan.

Samtang agi’g paghigpit pud sa seguridad sa City hall sa dakbayan gibutangan og security camera sa atubangan sa ganghaan niini.

Gawas sa seguridad gikatahong makatabang usab kini pagmonitor sa mga kawaning magmika sa oras nga tingtrabaho.