Giunay og dunggab sa kaugalingong asawa ang usa ka bana human kini mipauli sa ilang balay nga hubog ug nanghagis pa sa mga sakop sa ilang pamilya diha sa barangay Singko sakop sa lungsod sa Tuburan niadtong milabay'ng gabii.
Ang biktima nga nalandig sa Vicente Sotto Memorial Hospital giila nga si Alexis Bajable, 33, samtang ang gitumbok nga suspek mao ra usab ang iyang asawa nga si Monaliza.
Matud pa ni Monaliza nahadlok siyang dapatan niini human kini niya gibadlong nga moundang na ug dili na magpalabi og inom.
Apan inay mopatuo nasuko na hinoon kini ug nanghagis sa ilang balay, sa iyang kahadlok nga madapatan nikuha siya og kutsilyo ug gidunggab ang bana.
Ang biktima nakaangkon og samad dinunggaban sa tuong bahin sa hawak ug luwas na hinoon kini sa peligro.