2 "kawatan'' dakpan

Nasikop sa gipahigayong hot pursuit operation sa kapolisan sa dakbayan sa Talisay ang duha ka suspetsadong kawatan diha sa barangay Tabunok sa nahisgutang dakbayan.

Ang mga suspetsado giilang sila si Jamil Sarip, 19-anyos ug Al Tantay, 22, parehong residente sa sitio Mananga Tabunok ang nagtingkagol karon sa Talisay detention cell.

Sila si PO3 Mikie Espina, PO2 Roy Sarsaba ug PO1 Epifanio Comendido sa theft and robbery section ang mipahigayon sa maong operasyon human ang biktima sa pagpangawat nga si Michelle Abranica, 54, residente sa nahisgutang barangay ang mitaho diha sa police station sa barangay Poblacion.

Base sa imbestigasyon sa maong mga polis nga ang mga suspetsado nakasulod sa balay ni Abranica human ang atubangang pultahan niini ang gibiyaan nga wala ma-lock.

Gidala sa maong mga kawatan ang usa ka laptop computer nga nagkantidad og P30 mil ug usa ka camera nga nagkantidad og P5 mil.

Ang maong mga butang nga gi-deal na sa mga suspetsado ngadto sa ubang mga residente sa Camella Homes diha barangay Lawaan I na-recover usab sa mga polis.