76 na ka tawo ang may AIDS dinhi

Niabot na og 76 ka tawo nataptan sa HIV/AIDS dinhi sa dakbayan sa Sugbu sukad niadtong tuig 1989 sumala pa ni Dr.  Ilya Tac-an, ang labaw sa Sexually Transmitted Disease/Acquired Immune Deficiency Syndrome Detection Unit sa Cebu City Health Department.

Upat sa maong mga biktima natala sa unang bahin niining tuiga nga naglangkob sa duha ka ginang, usa ka lalaki nga blood donor, ug usa usab ka lalaking tinun-an.

Kini nakapaalarma ni  Tac-an tungod kay sa miaging tuig, upat lang ka kaso ang namonitor ug natala sa iyang buhatan.

Niingon si Tac-an nga ang kinabataan nga nataptan sa nahisgutang sakit dinhi sa siyudad nagpangidaron og 16 anyos, samtang 79 anyos usab pinakatiguwang.

Subling nanawagan si Tac-an sa publiko nga likayan ang nahisgutang makamatay nga sakit tungod kay giingong wala pay klarong tambal alang niini.

Kini pinaagi usab sa paghinumdom kanunay sa “ABC” nga mao ang Abstinence kon paglikay sa pakighilawas sa lain-laing partner.

Be faithful kon matinud-anon sa asawa kung minyo, ug kung dili mapugngan ang lawasnong panginahanglan, gisugyot sa mga health officials ang paggamit og condom.

Sa pikas bahin, giawhag ni Doctor Tac-an ang mga Sugbuanon nga mosalmot sa ilang kalihukan nga ipahigayon ugmang adlawa.

Kini gitawag og “Walk for a Cause” subay usab sa pagsaulog sa 25th International AIDS Candlelight Memorial nga pagahimoon matag ikatulo nga Domingo sa buwan sa Mayo.

Ang Walk for a Cause ipahigayon sa alas 4  sa hapon gikan sa Fuente Osmeña ngadto sa Kapitolyo ug balik sa Fuente Osmeña ug sundan kini dayon sa pagdagkot sa mga kandila.

Tumong sa nahisgutang kalihukan mao ang pagpahibalo sa publiko sa risgo nga dala sa maong sakit ingon sa paghatag og bili ug padayong pagmahal sa mga tawong nataptan niini ug uban pa.

Ang Walk for a Cause pasiugdahan sa Cebu City Aids Council ug gipaabot nga ubanan kini sa mga ahensyang hingtungdan ug ang nagkadaiyang mga NGO.