Australiyano nagpatabang sa NBI pagsikop sa babaye

Usa ka Australian national kinsa giingong giilad  midangop ngadto sa National Bureau of Investigation (NBI) aron mangayo og ayuda nga masikop ang  babaye nga gipasanginlan nga nangilad niya.

Si Robert Macartney   kinsa temporaryong nagpuyo sa Sta. Fe, isla sa  Bantayan   miluwat  og affidavit batok kang Sheila Gorres-Reguero kinsa nadakpan sa entrapment operation sa NBI-7 kagahapon human modawat sa marked money gikan ni Macartney. Matud  sa Australiyano  nga si Reguero nga tungod sa iyang  legal background tungod  kay  ang amahan niini usa ka abogado  iya  kining  gikuha aron moporma og  business corporation  nga  gihinganlan  og Egret Asian Marketing & Management Incorporated.

Si Sheila uban sa iyang mga anak, bana niining si Chok-Chok ug usa ka tawo kinsa giingong tag-iya sa usa ka nalunod nga Japanese Steel Vessels   miadto kaniya ngadto sa White Sand Restaurant Bantayan Island diin siya magbakasyon.

Sa affidavit ni Macartney nagkanayon kini nga si Reguero  misugyot kaniya nga mosulod og negosyo nga pagpamalit og mga scrap metals gikan sa nahisgutang nalunod nga barko ug mihangyo nga ang Australian national maoy mo-finance niini.

Si Macartney nagkanayon nga sugod niadtong buwan sa Pebrero niining tuiga mipadala siya og P300,000 ngadto kang Reguero isip pasiunang kapital sa nahisgutang negosyo hangtod nga mikabat na ngadto sa P760,000 ang iyang nahatag kang Reguero.

Apan natahap siya tungod kay dihang misugyot siya nga mobisita ngadto sa project site sa San Isidro, Leyte giingnan siya ni Reguero nga dili maayo alang kaniya nga adto sa site.

Hinungdan nga mi-hire  siya og tawo nga moadto sa project site aron maniid apan nakugang na lang siya tungod kay nasuta nga walay barko nga giingon ni Reguero ug wala ang nahisgutang proyekto nga gipasalig ni Reguero ngadto kaniya.