Unos, hangin peligroso

Bisan nakagawas na ang duha ka bagyong mihulga sa nasud apan nagpabilin gihapon ang hulga karon sa gagmay'ng sakyanan sa dagat ang hangin nga Habagat.

Si weather forecaster Vangie Tolentino sa Philippine Atmospheric Geophysical and Astronomical Services Administration (PAGASA)—nga nagbase sa Mactan, nagkanayon nga ang mga bagyong Cosme ug Dindo nga pulos may gikusgong 65 kilometro matag takna, nagbuwag og agianan paingon sa gawas sa nasud.

Si Cosme mibadhas sa tumoy nga bahin sa Palawan samtang si Dindo dapit sa Luzon kansang presensya sa maong mga lugar nagdala og ulan sa nagkalainlaing lugar sa nasud.

Apan bisan pa kun tua na paingon sa gawas ang maong mga bagyo, baluron lang gihapon ang kadagatan sa nasud nga peligro kaayo sa gagmay nga mga baroto ug ang unos matag karon ug unya ania lang gihapon sa palibot tungod sa inter -tropical convergence zone (ITCZ).

Matud pa ni Tolentino  nga ang hangin nga Habagat nakahunat na sa pagkakaron nga maoy mohatag og dugang pundo sa tubig nga maoy basihanan sa Pagasa nga miabot na ang panahon sa ting-uwan sa tibook nasud ug hingpit nang gibiyaan ang ting-init.

Sumala sa naandang lakaw sa panahon, ang Hunyo maoy buwan nga ting-uwan ug panahon usab nga ting-Habagat.

Busa padayong gipasidan-an sa mga tinugyanan sa panahon ang mga mananagat nga dili mokompiyansa  sanglit adunay unos nga kalit kaayong mobulhot sa palibot matag karon ug unya kansang hangin morag bagyo, matud pa ni Tolentino.