P.4M nga construction materials gikawat

Mokabat og dul-an P400,000 nga kantidad  sa mga construction materials ang nahanaw sulod sa usa ka tindahan nga gilungkab sa wala pa mailhing  kawatan nga giingong nagdala pa og sakyanan.

Gituuhang  gilungkab niadtong Lunes sa kaadlawon ang Embryo Trading nga nahimutang diha sa barangay Pitogo lungsod sa Consolacion ug nadiskubrehan kini niana nang pasado alas 8 sa buntag sa susamang adlaw.

Segun sa report, usa ka Edwin Gumandoy, residente sa sitio Sambag sa barangay San Vicente Liloan ug sales supervisor sa maong tindahan maoy nakadiskubre ug ni-report sa kapolisan.

Sa gihimong imbestigasyon ni Insp. Leoncio Baliguat, hepe sa kapolisan sa maong lungsod giguba ang kandado sa rolling doors.

Sa dihang nakasulod na kini gipangkuha ug gidala ang tanang construction materials.

Ang nadala sa mga kawatan mao ang usa ka air compressor, 28 ka unit sa angle grinders nga nagkalain-lain ang kantidad, walo ka unit impact drill, usa ka demolition hammer, usa ka jigsaw blade, lima ka impact drill, usa ka buok  KYK box wrench kit, usa ka dewalt circular, tulo ka unit sa jigsaw ug laing usa ka demolition hammer diin ang tanan mokabat sa P363,000 kapin.

Si PO3 Ruben Alin nga nahinabi sa Banat News miingon nga dako ang ilang pagtuo nagdala og sakyanan aron makargahan ang mga kawatan sanglit dili madala og usa ka tawo ang maong gipangkawat.