41 pamilya sa Sinsin kuli nang 'kabalik

Kuli na nga makabalik sa ilang pinuy-anan ang 41 ka mga pamilya diha sa barangay Sinsin nga gipabakwit sa kagamhanan sa dakbayan sa Sugbu.

Kini maoy gipadayag ni Konsehal Gerardo Carillo, ang chairman sa Cebu City Disaster Coordinating Council (CCDCC) human usab gideklarar ang ilang lugar nga danger zone.

Ang Mines and Geo-Sciences Bureau (MGB-7) uban sa CCDCC maoy nirekomendar nga i-relocate ang 41 ka mga pamilya tungod sa kakuyaw nga mabiktima sa laing landslide.

Kini tungod sa giingong padayon nga paglihok sa yuta partikular na diha sa sitio Nangka nga niresulta sa landslide pipila ka semana na ang nakalabay.

Matod ni Carillo ilang pabutangan og checkpoint ang agianan sa mga molupyo duol sa gideklarar nga danger zone ug patabangon ang mga opisyal sa barangay Sinsin sa pagbantay.

Gipasalig hinoon ni barangay kapitan Ramon Ylaya Jr., ang pagpadestino og mga barangay tanod sa sitio Nangka nga maoy mobadlong sa mga molupyo nga di na sila pabalikon sa ilang pinuy-anan.

Ang gipabakwit nga mga residente anaa karon temporaryong gipahimutang sa sports complex diha sa barangay Sudlon Uno samtang ang dakbayan mangita pa og mas luwas nga dapit nga kabalhinan.

Usa niini ang luna nga gipanag-iya ni kanhi Konsehal Procopio “Coping” Fernandez nga maoy haom balhinan sa mga evacuees human usab masusi ni Kapitan Ylaya.

Ang Department for the Welfare of the Urban Poor (DWUP) maoy gitahasan ni Carillo sa pagpangita og luna nga permanente nang kabalhinan sa apektadong mga residente.

Sa kasamtangan niingon ang konsehal nga ang siyudad maoy mo-supply og pagkaon kanila apan wala pa matino kung hangtud kanus-a ang siyudad moabaga sa ilang konsumo.