Hepe sa traffic division sa dakbayan sa Talisay Police Senior Inspector Arceliano Bañares mihimakak sa mga pasangil batok kaniya nga nakigsabot-sabot lang siya sa mga tag-iya sa motorsiklo nga na-impound aron ma-release.
Si Bañares sa pakighinabi niini sa Banat News kagahapon sa buntag mihimakak sa mga pasangil apan miangkon duna siya’y gipang-release nga mga motorsiklo apan ubos kini sa mando sa Land Transportation Office (LTO).
Dunay migawas nga mga report nga si Bañares giingong makigsabot-sabot lang sa mga tag-iya og motorsiklo ug iyaha kining i-release.
Kagahapon gipakita ni Bañares sa Banat News ang mga resibo nga gikan sa LTO nga dunay release order sa 19 ka mga motorsiklo.
Ang mga drayber sa maong mga motorsiklo nga gipang-impound sagad nga violation mao ang kakulang sa mga eksaktong dokumento.
Samtang ang uban nalambigit og bangga nga gi-release sa hepe sa traffic division gikatahong dunay “affidavit of undertakings” gikan sa financing aron mabawi ang mga motorsiklo tungod kay ang miutang niini wala na mobayad apan ipresentar kini gihapon ngadto sa korte kung gikinahanglan.
Matud pa nga ang pipila sa mga motorsiklong gipang-release ni Bañares na-impound panahon pa sa kanhi hepe sa traffic division nga si SPO1 Joseph Glen Burlas.
Apan matud ni Bañares nga wala nay labot si Burlas sa kalihokan sa traffic division karon tungod kay dili na kini maoy hepe.
Si Bañares midungag nga naghuwat siya sa report gikan sa motorpool sa giingong pagkuha ni Burlas sa lingkuranan sa usa ka motorsiklo nga na-impound.