Duha ka anggulo gisubay

Duha ka anggulo ang gisubay sa kapolisan sa dakbayan sa Lapulapu sa pagpusil patay ni SPO4 Asterio Butron sa milabay'ng gabii diha sa Maximo Patalinhug Ave. barangay Basak dakbayan sa Lapulapu.

Base sa pamahayag sa duha ka mga imbestigador nga sila ni SPO2 Rolito Jumao-as ug SPO1 William Homoc ang anggulo sa tulis maoy pinakabug-at nga motibo nga ilang nakita.

Matod pa ni Jumao-as dili angayang basehan ang pagka-recover sa pitaka ug cell phone sa biktima nga makunsiderar nga walay tulis nga nahitabo gumikan kay posibleng adunay “strong resistance” nga gihimo si Butron batok ngadto sa tulo ka mga pasahero niining posibleng mga tulisan.

 Apan gumikan kay gitabangan kini ug nakuha gyud ang 9mm service pistol sa maong polis posibleng mao usab ang gigamit sa pagpusil sa biktima ug wala na kini makahunahuna ang mga tulisan sa pagkuha sa pitaka ug cell phone ni Butron.

Dunay usa ka basiyo sa kalibre 9 mm diha sa sulod sa taxi nga gituohang gikan sa armas ni Butron ug gituohang posibleng giunay kaniya ang iyang armas. Si Butron dunay igo sa aping ug sa tangkugo.

Gisusi usab ang anggulong panimalos ang motibo gumikan sa kasong pagpamusil nga gikalambigitan ni SPO4 Butron sa milabay'ng katuigan.

Matod pa ni Homoc nga base sa iyang nakuhang impormasyon ug gani maoy iya usab nga gisubay nga sa milabay'ng katuigan si Butron natangtang sa iyang serbisyo human kini gilambigit ug gipasakaan og kasong pagpamusil apan na-dismiss ang maong kaso ug siya nabalik sa serbisyo sa PNP.

Apan ang kapikas ni Butron nga si Generosa sa pakighinabi sa Banat News kagahapon nitug-an nga dili pa hinuon siya makatumbok kung gituyo o ba kaha gitulis ang iyang bana.

Ang iya lang nga mahatagan og hustisya ang kamatayon sa bana ug kining tanan adto niya gisalig sa mga imbestigador samtang kabahin sa reklamo niini nga wala dayon maatiman ang bana sa mga doktor maong namatay, ang medical director sa Mactan  Doctors Hospital nga si Dr. Jose Montesclaros sa balita sa TV Patrol Central Visayas mihimakak niini.

Matud pa sa maong balita nga si Butron nakasinati og “massive bleeding” sa samad sa buko-buko nga nakaingon sa paspas nga pagkamatay niini.

Giawhag hinuon ni Montesclaros ang kabanay sa maong polis sa pagbisita sa ilang buhatan aron mahatagan og katin-awan sa nahitabo.

Si Butron gipusil patay sa milabay'ng gabii samtang nagmaneho sa iyang taxi unit sa tulo ka pasahero niini pag-abot diha sa dalan Maximo Patalinhug Avenue sa barangay Basak ug kini gituuhang gitulis ug gipatay human misukol.

Wala makuha ang personal nga mga gamit sama sa cellphone, pitaka ug kwarta niini gawas lang sa iyang armas.