Upat nga natikyaob sa dagat nanglangoy

Upat ka mag-uuling nga gikan sa Buenavista, Bohol ang naluwas human malunod ang ilang gisakyang pumpboat sa kadagatan sa Isla sa Pangan-an ug Kauhagan Isla sa Olango dakbayan sa Lapulapu kagahapon sa buntag.

Base sa impormasyon nga giluwatan ni Insp. Aurora Rayos sa kapolisan sa dakbayan sa Lapulapu alas 6:30 kagahapon sa buntag nakadawat sila og tawag gikan sa barangay Pangan-an nga adunay upat ka mga lalaki nga luwan sa usa ka pumpboat nga nalunod sa maong dapit.

Ang naluwas mao sila si Alfonso Juario, 30; Jeto Dango, 33; Lito Centillas, 36 ug ang igsoon niini nga si Armando Centillas, 34, pulos   lumad sa barangay Hunan sa lungsod sa Buenavista, Bohol nga tripulante sa M/B Josephine nga gipanag-iya ni Jun Torreon sa Buenavista.

Nasuta nga gilangoy lamang sa upat ang dagat human maunlod ang ilang pumpboat padulong sa lapyahan sa isla sa Pangan-an nga adunay gilay-ong 500 ngadto 800 metros.

Base sa nakuhang impormasyon sa Banat  News gikan sa Buenavista ang upat ug padulong kini sa lungsod sa Cordova aron ihatud ang mga kargang sinakong uling.

Apan gumikan sa dagkong balud ug kusog nga hangin natikyaob ang ilang gisakyang pumpboat ug tungod kay nagkakusog na ang hangin ug bawod sa lawod ug walay nakahibalo sa nahitabo kanila nakadesider silang manglangoy padulong sa isla.

Kahinumduman nga sa milabay'ng Domingo upat ka mga tawo ang naluwas human malunod ang ilang pumpboat sa susamang dapit gumikan sa makusog nga hangin mugna sa bagyong si Butchoy.

Kagahapon dunay nasigpatang laing bagyo ang awtoridad nga giingong mosulod sa nasud nga bagyong si Cosme.

Ang Philippine Coastguard Cebu Station niadtong milabay'ng adlaw mipagawas og direktiba sa pagdili sa mga gagmay'ng baroto sama sa pumpboat sa paglawig bisan walay bagyo tungod sa naobserbahang dagko kaayong mga balod ug kusog nga hangin.