Gipuspusan namatay

Gipusposan og tubo ug namatay ang usa ka mananagat sa kauban ra usab niining mananagat human nagkalalis atol sa ilang panag-inom sa sitio Silingga, barangay Botigues lungsod sa Bantayan sakop sa isla sa Bantayan niadtong Domingo sa alas 11:00 sa gabii.

Ang biktima giila sa kapulisan nga si Joshua Flores, 28,  ulitawo, lumad nga taga Burias Island Masbate samtang ang suspek mao si Agosto Mahusay Ectana Jr., 22, molupyo sa Naro Island barangay Talisay Kawayan, Masbate.

Matod sa hepe sa kapulisan sa Bantayan SPO4 Melquides Seares Jr., gikan pa sa Burias island ang biktima ug suspek aron sa pagpanalom og balat sa dagat.

Matod ni SPO4 Siares nag-inom ang biktima ug ang suspek sa giabtan nilang balay apan nagkalalis kini ug maoy hinungdan nga nikuha og tubo ang suspek ug gibunal bunalan ang biktima.

Ang suspek nakasibat unta human sa hitabo apan paglabay sa pipila ka oras boluntaryo kining nitahan sa iyang kaugalingon sa mga tanod sa barangay ug mao nay nihatod kaniya sa kapulisan.