Duha ka German gikawatan

Duha ka negosyante nga German nga kasamtangang nag-check in sa usa ka resort sa barangay Guiwang lungsod sa Alcoy ang nabiktima sa pagpanglungkab niadtong Domingo sa alas 5:00 sa hapon.

Ang mga biktima giila nga sila si Frank Detlef Knof ug Guido Kalitzki, kasamtangang nag-abang og duha ka managlahing lawak sa maong resort.

Ang mga nahanaw nga butang ni Detlef Knof mao ang mahalong external hard disk niini og usa ka Sony Digital Camera samtang si Kalitzki nawad-an sab og 28,000.00 nga Thailand Baht ug 150 nga Euro ingon man credit cards, atm card ug usa ka Sony Ericsson nga cellphone.

Matod sa hepe sa Alcoy Police Station Sr./Insp. Jesus Elmer Fernandez dihang nahinabi sa Banat News subay sa gihimo niiining imbistigasyon ang mga biktimang langyaw nisuroy sa Bodos Bamboo bar sa Poblacion aron adto manihapon nianang pagka Sabado sa alas 7:00 sa gabii ug sa ilang pagbalik mao nalay ilang naabtan nga wala na diha ang maong mga butang.

Dihang paingon na untang matulog si Detlef Knof didto niya mahibaw-I nga wala na ang iyang external hard disk nga maoy gibutangan sa mga kanta nga patukaron unta sa computer.

Daling gipahibawo niini ang iyang kauban nga si Kalitzki og gihimo dayun nila ang imbintaryo sa ilang mga butang og didto pa nila masayri nga nahanaw na ang mga nahisgutang butang.