Mi-ambush sa budol gang 'polis'

Pagbanhig-patay sa duha ka gidudahang mga sakop sa Budol Gang ug pagkaapil sa laing usa ka babaye gidudahang polis ra usab ang mihimo apan gihimakak kini dayon sa kapolisan ug miingong tulo ka anggulo ang gisubay nila karon kabahin niini. Si Sr. Supt. Patrocinio Comendador, director sa Cebu City Police Office nagkanayon nga ilang gisusi karon ang panagbangi sa mga miyembro sa grupo ni Jose Mias Magno sa Davao human sila makakuha og impormasyon nga gibaharan kining patyon ug ipadakop.

Laing gililing anggulo mao ang pagdumot sa mga nabiktima nila sanglit dunay mga nabiktimang adunahan ug minilyon ang nailad ug ang ikatulo ang mga tawong mibutang sa ilang mga kamot sa balaod .

Matud pang Comendador dili kalikayan nga silang mga polis mapasanginlan sa nahitabo kang Magno, sa kauban niining si Medase Castro ug kang Evelyn Magno nga giingong asawa ni Magno nga pulos napatay niadtong Lunes sa hapon diha sa Unit 5, Oprra barangay Kalunasan pipila ka minutos gikan gi-release sa Cebu City Jail.

“We can’t prevent the public from speculating that the police are involved in the killing, kabahin sa among mga polis ato silang gidakop ug gikasuhan, we’ve done our part,” asoy pang Comendador kinsa nagkanayon nga tungod sa kadaghang gimbuhaton sa mga polis matag adlaw wala nay makatutok sa matag dinakpan.

“We can’t shortcut life though they were arrested criminally we can’t shortcut justice. Everybody should undergo with the judicial process because we value life also,” dugang Comendador.

Samtang gisusi pa sa Homicide Section ug sa Theft and Robbery Section ang koneksyon sa naangol nga retiradong sakop sa Philippine Air Force nga si Henry Comandao kinsa napusilan sa ulo samtang nagmaneho sa Hyundai Starex van nga gisakyan sa tulo ka napatay.

Matud pang Comendador wala pa sila ikapasangil batok kang Comandao apan wa usab nila isalikway ang posibilidad nga dugay nang managkaila si Comandao ug ang mga napatay tungod kay mismong si Magno human kini madakpi mitug-an sa mga polis nga duna gyud sila’y van nga gigamit.

Samtang kabahin sa kung kinsay nakahibalo nga mopiyansa nianang adlawa ang duha alang kang Comendador ang pagbutang og piyansa ug pag-release diha sa prisuhan dili sekretong buhat sanglit daghang mga tawong malambigit paghikay niini, sama sa korte, Bureau of Jail Management and Penology, mga biktimang nitutok sa kaso, mga tawong naa sa bisinidad sa prisuhan ug bisan na mga kaubanan sa gipamatay nga posibleng nagdumot kanila.

Apan bisan paman mipasalig si Comendador nga tanang dapit nga angayang utingkayon may kalambigitan sa pagbanhig ilang apilon sa imbestigasyon.

Si Bise Mayor Michael Rama nga maoy chairman sa Police Coordinating and Advisory Council (PCAC) nagtoo nga magpabilin ang pagduda sa mga tawo kung dili masulbad ang maong kaso.

“Ang pagduda magpirmi gyud na kung dili makit-an kung kinsa ang nagpatay, ako na man na silang giawhag nga kung apil mo, undang na mintras tanto nga wala pa masakpi, just in case kung apil mo, kung dili mo apil, hala pangitaa kay basin og maapil pa mo,”sumala ni Rama.

Ang bise  mayor nipadayag og kasubo sa maong hitabo ug labaw nang dakong supak sa maong paagi sa pagpangita og hustisya.

Nagtoo si Rama nga ang pagpatay sa gituohang mga kriminal dili maoy sulbad sa pagpugong sa kriminalidad.

“You may kill the body but you can not eliminate the ideology, you may eliminate the criminals but if you have not eliminated the reason why they become criminals, in the matter of time there are still criminals because deprivation can always cause aggravation,” matod ni Rama.