Batan-on bag-ong nanulis sa babaye nasikop sa polis

Nadakpan sa kapolisan ang usa ka tulisan nga mao pa lang gyud untay pagkahuman og pagpanulis sa mahalong cellphone gikan sa usa ka babaye nga iyang gikasakay sa multicab nga pasaheroan didto sa National Highway ug corner F. Morello  barangay Poblacion lungsod sa Compostela Cebu niadtong Biyernes sa alas 8:40 sa gabii.

Ang nadakpan nga suspek giila nga si Florencio Derecho Almerez Jr., alyas Jongjong, 18, ulitawo, molupyo sa barangay Pulang Yuta siyudad sa Danao.

Samtang ang kasakay niya nga pasahero nga iya  untang gibiktima naila nga si Chyrel Himaya Tigbao, 26, dalaga taga barangay Yati lungsod sa Lilo-an Cebu.

Subay sa gihimong imbistigasyon sa kapolisan nagsakay ang biktima ug suspek sa multicab nga paingon mobiyahe dinhi sa dakbayan sa Sugbu apan paghiabot sa maong lugar kalit lang gilabni sa suspek ang gibitbit nga cellphone sa biktima nga 250 samsung ug dihang misinggit og tabang ang biktima abtik kining miambak sa sakyanan ug dayong dagan pahilayo.

Naatol nga dihay mga polis sa maong lugar niadtong higayona nga sila si PO2 Richellieu Ayuda og PO1 Ralph Laurel nga daling nakaresponde ug didto ilang gikasugat ang suspek nga nagdagan og gitionan kini sa armas ug nadakpan.

Na-recover sa kapolisan gikan sa posesyon sa suspek ang cellphone sa biktima og gibalhug ang suspek sa detention cell sa kapolisan sa Compostela ug gitakdang pasakaan og kaso karong buntag.