"Budol" suspects nangadakpan

Naalerto na pag-ayo ang kapolisan sa dakbayan sa Sugbu human sa sunod-sunod nga reklamo kabahin sa binuhatan sa mga “budol gang” sukad pa niadtong bulan sa Abril diin gibana-banang mokabat na sa P5 milyones ngadto sa P10 milyones nga salapi ug mga alahas na ang nadagit gikan sa mga nabiktima dinhi.

Niadtong adlaw'ng Huwebes duha ka gidudahang miyembro sa notoryos nga “budol gang” gikan sa dakbayan sa Davao ang nadakpan sa 75-anyos nga ginang diin ang usa nadakpan atol sa entrapment operation dihang misuway kini og suhol sa mga polis.

Ang nangadakpan giilang sila si Magno Mias, 43, taga barangay Buhanging dakbayan sa Davao ug ang gituuhan kauban niini nga taga dakbayan sa Mandaue nga si Medase Castro,45.

Ang biktima nga 75-anyos nga mihangyong di magpahingalan sa pakighinabi sa Banat News niadtong Huwebes sa hapon nagkanayon nailad siya ni Mias pipila na ka semana ang nakalabay.

Matud pa niya diha siya sa usa ka mall sa dalan Colon niadtong tungura dihang giduol siya ni Mias ug gibulatik og maayong paliton og tag singko mil ang iyang mga alahas, hinungdan nga mikuyog siya ug gipasakay og van ug gibinlan lang og mga “budol” nga kwarta.

Matud pang Sr. Insp. Michael Bastes, hepe sa Theft and Robbery Section  sa Banat News nga niuli pa gyud ang biktima aron kuhaon ang ubang alahas ug salapi ug gitunol ngadto sa mga suspek apan gibiyaan lang kini dayon human tunuli og plastic nga may sulod kunong kwarta apan diay mga pinutol kining papel.

Ang 75-anyos kinsa nisuroy pag-usab sa maong department store nakasigpat kang Mias diha sa maong tindahan ug daling miduol ug gihinginlan sa iyang kwartang 800 dolyares ug alahas nga mobalor tanan og P300,000 nga nadala niini.

Apan gikatahong misinghag ang suspek ug giingnan lang ang biktima nga “wala ko kaila nimo” dayong dagan palayo apan gigukod kini sa biktima ug nagsige og singgit og “mangingilad nang tawhana!” ug nagpakitabang sa ubang mga tawo.

Si Mias gidala sa Waterfront Police Station ug didto gikatahong misuway kini og padayag nga iyang bayran og P100,000 ang biktima ug ang mga polis hatagan usab og P50,000 aron dili na kini dakpon ug dili panawgon ang uban pang mga biktima.

Tungod kay daghan namang kasong susama niini gipasa ang maong kaso ngadto sa TRS ug diha na giandam ang entrapment operation diin si Castro maoy nakigkita ni SPO2 Geoffrey Diola nga gisugo ni Bastes paghimo sa maong laang diha sa usa ka fastfood chain duol sa Cebu City Police Office.

Human matunol ni Castro ang kwartang P150,000 nibarog na si Mias ug si Castro aron mamauli apan gikatahong nangayo pa kini og pamelete pang-taxi ug diha-diha giposasan ni Diola ang duha.

Si Comendador nanawagan karon sa publiko sa dili pagpadala sa mga ilad ilabi na kung ang hisgutan mao ang “easy money” diin pasaligan sa mga suspek og dagkong ginansya basta mobutang lang og puhunan sama sa alahas, kwarta ug uban pa.

Si Mias dihang gipangayoan og habig sa mga sakop sa media midumili paghatag og komento gawas lang sa pagsulting walay labot si Castro sanglit igo ra kining gisugo paghatud sa kwarta.

Mitug-an usab kining mag-anhian siya matag-karon ug unya dinhi sa dakbayan.