Paghiusa panawagan ni Vidal sa M'daue leaders

Ang paghiusa sa mga opisyal maoy unod sa iyang mensahe sa iyang homily ni Ricardo Cardinal Vidal, Arsobispo sa Sugbo atol sa tinuig nga pangilin ni Senyor San Jose, patron sa dakbayan sa Mandaue.

Si Cardinal Vidal wala hinuon maghisgot sa padayon nga panagbingkil  nila ni Mayor Jonas Cortes ug sa oposisyon nga gipangulohan ni Bise Mayor  Carlo Pontico Fortuna.

“Maghiusa na unta kita diha ni Kristo ug sa atong simbahan,” ni Vidal pa sa iyang homily sa kapistahan sa maong dakbayan.

“Si Senyor San Jose usa ka matarong nga tawo,” nagkanayon ang Cardinal sa iyang mensahe atol sa iyang misa sa kapistahan nga gihimo sa national Shrine sa Saint Joseph Church.  “Dili magpakaulaw  sa iyang isig kaingon.”

Sa nasayran nga higpit ang panagbingkil karon nila ni Mayor Jonas ug Bise Mayor Fortuna uban sa mayoriyang konsehal nga kauban niya sa partido.

Naglakip sa ilang gikasungian mao ang pagpaguba sa public plaza sa atubangang bahin sa maong simbahan nga giingon sa kampo ni Fortuna nga nausik ang minilyon nga salapi.

Dugang nilang gikasungian mao ang pagdumili sa mayor sa pagpagawas og pundong salapi sa giaprobahan nilang ordinansa sa ilang pag-hire og legislative staff ug uban pa.