Cortes wa mahulga

Wala makatandog sa trabaho ni Mayor Jonas Cortes ang  giingong nabunggo nga plano sa pagpatay kaniya nga miresulta sa pagkadakop sa presidente sa Mandaue City College nga si Dr. Paulus Marie Cañete.

Si Mayor Cortes nga nahinabi sa Banat News mipadayag nga kabahin sa politika ang risgo sa kinabuhi nga maoy hinungdan nga wala kini makaapekto sa iyang panerbisyo publiko.

Matud pa ni Cortes nga ang kaayohan sa mga Mandauehanon maoy iyang tinguha ug dili lang kalikayan nga ang pipila niini dili makadawat sa kamatuoran.

Dugang pa niya nga ang kasaulogan sa tinuig nga pangilin ni Senyor San Jose, patron sa dakbayan nga malinawon  maoy kamatuoran nagmalampuson ang maong kasaulogan.

Maoy pagtuo ni Cortes nga wala pasagdi sa patron sa dakbayan ang iyang administrasyon sanglit atol sa tinuig niining pangilin napakgang man sa kapolisan ang dautan untang tinguha batok kaniya. 

Si Dr. Cañete nga nahinabi sa Banat News   hugtanong mihimakak sa pasangil nga giplano ang pagpatay sa mayor ang mipadayag nga ang pagdakop kaniya ang naglambigit sa kasungian sa  Mandaue City College.

Nunot sa mao niyang pagpanghimakak maoy iyang gipadayag nga ang mga ebidensiya nga naglakip sa armas nga giingong nakuha gikan kaniya ang gikan   sa sinugo  sa mga polis  aron  pagguba sa iyang pagkatawo.

Si Cañete nga gitudlo nga presidente sa MCC ni kanhi Mayor Thadeo Ouano ang nagdumili sa pagtahan sa mao niyang katungdanan bisan sa gihimong pagtangtang kaniya sa katungdanan sa pag-asumer ni Mayor Cortes.

Matud pa ni Cortes nga dili problema alang kaniya nga magpabilin si Cañete isip presidente sa MCC sanglit gitanyagan pa kini niya nga ibalik sa paghupot niini.

Gitataw ni Cortes nga ang iyang gipangayo kang Cañete mao lamang ang paghatag og kuwentada sa MCC apan bisan sa iyang mga pag-awhag sa gihapon padayon ang pagdumili sa paghatag niini.

“Nasunod ko lang ang maong problema,” ni Cortes pa sa iyang pamahayag. “Kay nagsugod pa man kini sa panahon pa ni kanhi Acting Mayor Amadeo Seno.”