State witness unta si Igoy–Roderos

Gibutyag ni Police Regional Office-7 Chief Supt. Ronald Roderos nga gilaraw unta nilang himuong state witness ang gi-ambush patay nga si Recoly Igoy diha sa barangay Pakigne lungsod sa Minglanilla.

Nagplano unta ang kapolisan nga gamiton si Igoy batok sa mga kaubanan niini apan gituohang gumikan sa kabalaka sa mga kagrupo niini gitumba kini ug naamong pa hinuon si Ronalde Enario nga maoy nagmaneho para niya.

“Kasama o hindi but the same modus piyait must die. The same concept,” matud pa ni Roderos sa dihang nahinabi sa mga tigbalita kagahapon.

Dugang pa ni Roderos iyang gipakig-istoryahan si Supt. Louie Oppus, hepe sa kapolisan sa dakbayan sa Lapulapu kabahin sa maong hitabo.

Matud ni Roderos nga nitakdo ang maong binuhatan ngadto kang Igoy sa nahitabo kang Brandon Babao nga taga siyudad sa Carcar nga gi-ambusan usab sa armadong tawo diha sa pier 4 samtang nagsakay og taxi paingon sa South bus terminal human mipyansa diha sa dakbayan sa Lapulapu sa kasong robbery sa milabay'ng tuig.

Matud pa ni Roderos base sa ilang panagsabot ni CPPO Director Sr. Supt. Carmelo Valmoria himuon unta nilang state witness si Igoy batok sa mga kaubanan niini.

Si Igoy ug Nelson Gutierrez misuway ug napakyas pagtulis sa  Rural Bank of Cebu South Inc. sa miaging Abril 28 sa siyudad sa Carcar diin napusilan patay ni SPOI Meliton Agadier si Gutierrez.

Una nang milutaw ang pangalan ni Roy Fernandez nga notoryos nga kidnap for ransom ug robbery group sa Luzon nga maoy konektado nila Gutierrez ug posibleng maoy nag-rekrut sa duha.

Si Fernandez usab ang gitumbok nga nipaluyo kaniadto pagpapatay usab sa nipiyansang si Rodulfo Atega Jr. sa milabay'ng tuig kinsa giingong sakop usab sa Meloy Garcia Robbery Group nga giingon gihapong minugna ni Fernandez.

Giklaro ni Roderos andam silang mohatag og seguridad sa lima ka mga witnesses nga anaa karun sa kapolisan sa Minglanilla tungod kay gitataw niini nga mao ang mga kabanay sa napatay.

Gani miingon si Roderos kinahanglan gyud nga ma-protektahan ang mga testigos gumikan kay dako kaayo og ikatabang sa habig sa prosecution.

Hinuon gipakagamay lang ni Roderos ang nahitabo kang Ygoy ug matud pa niya usa lang ka “isolated case” ug dili makaapekto ug hulga sa kahapsay ug kalinaw dinhi sa dakbayan ug lalawigan sa Sugbu ilabi na sa mga langyaw turista.

Apan ang amahan ni Igoy nga si Dioscorro sa balita sa Balitang Bisdak kagahapon nagkanayon nga di sila interesado sa imbestigasyon sa kapolisan kabahin sa insidente apan ilang gimahay ang mga namanhig nganong giapil ang drayber nga si Ronalde Enario.

Gipanghimakak usab niini ila ang mga sakyanan, ang giingong internet café diha tupad sa ilang balay hasta na usab ang pasangil nga nalambigit ang anak sa pagtulis sa money changer sa usa ka mall pipila ka adlaw una pa mahitabo ang pagtulis sa Carcar.

Dugang pa niini nga nagtuo silang luwas na unta ang anak human masutang duol na sila sa SRP tungod kay lahos-lahos na ang dagan sa sakyanan apan wala nila damha nga ma-traffic kini diha sa Pakigne diin diha na mahitabo ang pagpamanhig.