Merkado napun-an

Nadugangan na karon ang mga satellite market sa dakbayan sa Sugbo human inugurahi ang bag-ong special unit nga merkado sa siyudad kagahapong adlawa.

Ang building nga gipanag-iya sa dakbayan diha sa eskina sa mga dalan Urot ug Cabahug, maoy gihimo nga bag-ong merkado sa siyudad.

Kini kasamtangang giukupahan sa 17 ka mga sidewalk vendor nga mga sakop sa Cebu Handicraft Vendors Association (CHVA).

Nasayran nga ang nahisgutang mga manindahay nagpahiluna kaniadto diha sa Lapu-Lapu Extension, apan kini gipa-demolish sa kagamhanan sa dakbayan.

Kini ang hinungdan nga sila gi-relocate tungod kay giingong himoon nga access road sa South Road Properties (SRP) ang nahisgutang dalan.

Matud ni City Market Administrator Racquel Arce nga ang nahimutangan nga building sa mga vendors mosulod og kapin sa 40 ka mga manindahay.

Apan nagtuo si Arce nga kini mapuno ra sa umaabot nga mga adlaw tungod kay ang bakanti nga puwesto himuon usab nga relocation site sa ubang mga vendors.

“Katunga ra sa building ang nagamit karon pero kung dunay laing mga sidewalk vendors nga ipa-demolish ang mayor, kini gihapon maoy himoong relocation site,” sumala ni Arce.

Apan gipadayag sa market administrator nga ang tugotang makasulod sa maong merkado kadto lang mga manindahay nga mulopyo ug botante usab sa siyudad.

Nasayran nga gihatag na kagahapong adlawa ang Certificate of Award ngadto sa 17 ka mga stallholders nga mopamatuod nga sila maoy nag-okupa niini.

Miingon si Arce nga ang nahisgutang mga vendors mag-abang og P44 matag adlaw sa 5.5 ka metro kwadradong gidak-on sa stall.

Mga burloloy ang halos tanang baligya sa maong mga manindahay ug giingong mga lokal ug langyaw'ng mga turista usab ang kasagaran sa ilang mga customer.