Norwegian nalubaan

Nadunggaban ang usa ka Norwegian national samtang kini nakig-inom inom sa laing Norwegian national sa usa ka tindahan didto sa dalan Rodriguez, barangay Poblacion, siyudad sa Toledo niadtong milabay'ng adlaw sa alas 11 sa buntag.

Ang biktima giila sa kapolisan nga si Arne Eriksroed, 50,  kasamtangang nagpuyo sa Luray-II sa nahisgutang siyudad.

Samtang ang gitumbok nga suspek mao ang usa ka Elisio Rodriguez Jr., alyas Junjun, hingkod ang panuigon ug nagpuyo sa dalan Climaco, sa nahisgutang siyudad.

Matud ni SPO4 Edgar Noel sa Toledo City Police dihang nahinabi sa Banat News subay sa imbistigasyon niini ang biktima nag-inom kauban sa laing Norwegian national nga naila lang sa pangalan nga Paul sa gawas nga bahin sa usa ka tindahan.

Samtang ang suspek kauban ang mga barkada niini nag-inom usab sa sulod nga bahin sa maong tindahan.

Sa dihang misulod sa tindahan ang biktima paingon sa comfort room aron unta sa pagpangihi gisugat kini sa usa ka Dindo Gastador ug dayon gisukmag sa nawong sa walay daghang pangutana ug pagkahuman misunod ang suspek nga nagbitbit og kutsilyo ug diretso og dunggab sa biktima.

Ang biktima nga naigo sa hawak dali kining gidala sa Toledo City Hospital samtang ang ubang mga kustomer niadtong higayona nag-iyahay og panagan.

Sa pagresponde sa kapolisan nasikop si Rodriguez ug nakuha gikan sa posesyon ang kutsilyo nga maoy iyang gigamit pagpanunggab. Nagtingkagol na karon kini sa detention cell sa Toledo City Police samtang giasikaso pa ang kasong ipasak.