Tulisan sikop, MJ nasakmit

Nakaiskor kagahapon ang kapolisan batok kriminalidad human masakmit sa mga sakop sa SWAT sa Cebu City Police Office ang gibana-banang lima ka kilong pinaugang marijuana nga gibiyaan sa tag-iya atol sa ginukdanay gikan sa barangay Busay hangtud sa usa ka dakong hotel sa barangay Apas.

 Ang tag-iya niini nga gibana-banang 20 anyos pataas gikatahong nakaeskapo sa duha ka checkpoints apan sa ikatulong checkpoint diha sa may gate sa usa ka subdivision sa Busay nga gibantayan sa mga SWAT nasigpatan kini ug gigukod.

Sila si SPO2 Jose Ragel, SPO2 Edmundo Capanpangan, SPO2 Flaviano Atuel, SPO1 Diosdado Malazarte, SPO1 Victorio Durante, SPO1 Leovil Singson ug si PO3 Marcelo Lerio daling migukod kaniya apan ang naabtan mao nalang ang motorsiklo niining kolor itom ug yellow lakip na ang maong mga marijuana sulod sa sako.

Sa laing bahin usa ka Arnold Abadilla, 39,nga taga dalan B. Aranas Extension, barangay Duljo, Fatima ang nadakpan human ma-trap sa usa ka balay human manulis.

Usa ka Elena Miangar, 55, ang gisuwayan niini og tulis apan ang babaye misukol bisan gitiunan sa agtang sa dala sa suspek nga .38 kalibreng rebolber samtang luwan sa PUJ diha sa dalan C. Padilla.

Sa kahadlok sa suspek dali kining miambak sa jeep apan gigukod kini sa biktima ug nagpakitabang sa mga tawo hangtud nga nangabot ang mga polis ug na-trap kini sa usa ka balay.

Si Sr. Insp. Andres Bayarcal hepe sa Mambaling police station ug mga sakop daling mialirong kaniya hinungdang sa pagtahan niini. (Jane Eleguin)