TREAT andam na nga moresponde

Mga bag-o ug daang mga sakop sa Talisay Rescue Emergency Assistance Team (TREAT) ang gipaubos pagbansay-bansay kabahin sa Basic Emergency Response Course sa pag-andam sa ilang kaugalingon sa pagtubag sa mga emerhensiya.

Si Talisay City Fire Marshal Felipe Canillas ang mibutyag kagahapon sa buntag sa Banat News nga ang nahisgutang kalihokan ang gipahigayon niadtong Abril 15-30, 2008 sa firing range sa Talisay Aqua City Gun Club sa barangay Maghaway.

 Matud niini nga ang nahisgutang 15 ka adlaw nga training gilangkuban sa Medical First Responder (MFR) course, rescue on collapse structure ug search and rescue.

Ang TREAT adunay 14 ka miyembro karon kinsa siyam kanila ang daan na nga mga miyembro.

Matud ni Canillas nga sobra 20 ka Talisaynon ang mi-aplay nga mahimong sakop sa TREAT apan lima lang kanila ang nakapasar sa mga screening nga nadugang sa siyam.

Gitataw sa Fire Marshal nga ang mga sakop sa TREAT ang magdawat og sweldo gikan sa kagamhanan sa Talisay ug 24 oras kining mopahigayon og duty ug ubos sila sa obserbasyon isip mga casual nga kawani sa siyudad.

Ang maong grupo ang motubag sa bisan unsang emerhensiya ug matag tulo ka buwan ipaubos sila sa training isip upgrading sa ilang mga nakat-onan.

Ang buhatan sa TREAT temporaryo karong nahimutang sa buhatan sa Talisay City Fire Department.

Si Canillas midugang nga nagkinahanglan pa sila og dugang mga sakop sa TREAT.

Ang mga trainer sa TREAT sila si SFO1 Rudjard Abellanosa, FO1 Guiller Pegarido, Niel Angelo Sanchez sa Office of the Civil Defense ug John Paul Cesa sa Talisay City Local Government kinsa nakaapil sa training sa National Society on Earthquake uban sa mga sakop sa Emergency Rescue Unit Foundation (ERUF) nga gipahigayon ngadto sa nasud sa Nepal.

Karong Lunes human sa flag raising ceremony diha sa atubangan sa city hall sa dakbayan ang grupo adunay ipahigayong pasundayag sa pagpakita sa ilang abilidad.