Gidakop sa kapolisan ang duha ka magtutudlo sa Papan Elementary School nga nahimutang sa bukirang bahin sa barangay Papan, lungsod sa Sibonga, Cebu niadtong Martes sa alas 6 sa sayong buntag.
Kini human malutsi og warrant of arrest ang maong duha ka magtutudlo human gipasakaan og kaso sa korte tungod sa reklamo nga sayop niini nga mga rekord atol sa pagpahigayon sa barangay ug SK election niadtong bulan sa Oktubre sa milabay’ng tuig didto sa nahisgutang lugar.
Ang mga gidakop nga magtutudlo giila nga sila si Marife Lagondenio ug Analiza Guaren, mga molupyo sa maong lugar.
Sila si SPO3 Ramon Padilla, SPO1 Aristedes Carillo ug PO3 Jimmy Raiz maoy mi-serve sa warrant of arrest nga pinirmahan ni RTC Branch 29 Judge Maximo Perez batok sa maong mga magtutudlo.
“Regarding sa ilang erroneous report sa Comelec, gipasakaan sila og kaso diri sa Sibonga ug na-elevate sa RTC,” dugang asoy ni SPO3 Padilla.
Hinuon gibutyag ni SPO3 Padilla nga gi-release nila ang maong mga magtutudlo alas 2 sa hapon sa susamang adlaw human kini makabutang og piyansa nga P12 mil.
Giklaro hinuon ni SPO3 Padilla nga gipa-estambay lang nila sa presinto ang maong mga magtutudlo human nila kini masikop atol sa pag-serve sa warrant samtang gi-asikaso sa mga abogado niini ang pagbutang og piyansa.