Lima nalanag sa swaki

Lima ka mga tawo ang nalandig sa tambalanan niadtong Martes sa gabii human kini gikatahong nalanag sa ilang gikaon nga kon-kon o tihi-tihi nga nailhan usab nga swaki sa lungsod sa Medellin.

Si Mayor Ricardo Ramirez ang mibutyag nga nakadawat siya og taho kabahin sa maong insidente gikan sa ilang municipal health center kinsa ang lima ka mga biktima managsilingan.

Ang nalandig sa Bogo Memorial Medical Center mga alas 10:00 pasado sa gabii niadtong Martes sila si Cecilia Inot, 46-anyos, Darwin Inot, 22 ug Willian Inot, 20, Mamerto Ytoc, 30 ug Emelia Ruiz, 67, pulos taga barangay Kanhabagat sa nahisgutang lungsod.

Si Cecilia ang gikatahong gibalhin na kini sa Vicente Sotto Memorial Medical Center (VSMMC) samtang sila si Ytoc ug Ruiz ang naa karon sa usa sa mga pribadong tambalanan ning dakbayan.

Gikataho nga gipamati sa mga biktima ang tumang kasakit sa ilang tiyan, ingon man ang paglisod niinig ginhawa pipila ka oras human sa ilang pagkaon sa swaki.

Si Mayor Ramirez midungag nga ang mga biktima mao mismo ang nanguha sa mga swaki niadtong Martes sa hapon dihang dako kaayo ang hunas sa dagat nianang pagka-udto.

Ang Banat News nanawag sa Cebu Doctors Hospital aron sa pagtino sa taho nga ang duha ka biktima gidala sa maong tambalanan apan ang duty nurse sa emergency room nga si Kim Kan nipadayag nga walay nalandig sa ilang tambalanan sukad kagahapon sa gabii nga gikan sa Medellin.

Nasayran nga ang maong lugar niadto pang milabay'ng Pebrero gideklarar sa Bureau of Fishery and Aquatic Resources (BFR) nga adunay red tide.