Toy gun gigamit sa tulisan

Usa ka lalaking tulisan ang gidemalas human kini manulis gamit lang ang pusil-pusil atol sa iya nang pag-ikyas diha sa dalan Panganiban sa barangay Pahina-Central niadtong Lunes sa gabii.

Ang suspek giilang si Rene Salundaguit Cartoza, 27, taga barangay Soong dakbayan sa Lapulapu kinsa padulong na untang moikyas apan naapsan sa beat patrol sa kapolisan ug sa mga barangay tanod.

Sa imbestigasyon sa Carbon police station, ang suspek gikatahong mitulis sa usa ka Lindy Asero Jusayen, 27, nga maoy magbalantay sa usa ka lotto outlet sa nahisgutang dalan.

Ang biktima gikatahong mao pay pagpanirado sa iyang lotto outlet dihang kalit nga giduol sa tulisan ug gitiunan og armas dayong ilog sa bag niining maoy gisudlan sa cash nga P68,600.

Daling midagan ang suspek sa gi-parking niining motorsiklo sa unahan apan nakahigayon og singgit ang biktima sa pagpangayo og tabang hinungdan nga nadunggan nila ni PO1 Julius Cesar Tampus nga sakop sa Beat Patrol sa Operations Branch sa Cebu City Police Office ug sa kauban niining tanod nga si Benjamin Lapar,Jr.

Ang duha daling migukod sa suspek ug una pa kini makapadagan sa iyang motorsiklo naabtan kini ug nasikop ug gibalhog sa karsel sa Carbon police station.

Narekober diha sa iyang posesyon ang usa ka pistolang duwaan ug ang bag sa biktima nga maoy gisudlan sa salapi. Kasong robbery ang gikatakdang ipasaka batok kaniya.

Si Sr. Supt. Patrocinio Comendador, director sa Cebu City Police Office nitug-an nga bisan duwaan lang ang gigamit niini kasong robbery gihapon ang ipasaka batok kaniya tungod kay migamit kini og pagpanghulga.

Ang dakbayan sa Sugbu dunay ordinansa kabahin sa pagdili sa paghupot ug paggamit og mga toy guns ilabi na niadtong mga pareho kaayo og dagway sa tinuod nga armas tungod sa mga insidenteng susama niini.

Bugtong gitugutan makahupot ug makagamit niini mao ra kadtong mga sakop sa lehitimong airsoft enthusiasts nga rehistrado sa Securities and Exchange Commission ug may lisensya nga giisyu sa Firearms Explosives Security Agency Guards Supervisory Section sa kapolisan.