Suspek sa pusil-patay sa Danao nitahan

Mitahan sa iyang kaugalingon niadtong alas 10:00 pasado sa Sabado sa gabii diha sa buhatan sa Theft and Robbery Section (TRS) sa Cebu City Police Office ang usa ka suspetsado sa pagpamusil   sa barangay Cabangahan dakbayan sa Danao niadtong Domingo sa kaadlawon diin usa ang namatay ug naangol ang laing duha apil niini ang usa ka kagawad.

Personal nga nitahan sa   TRS chief  Sr. Insp.  Michael  Anthony Bastes mao si Epifanio Camacho, hingkod ang panuigon, lumolopyo sa maong lugar.

Si  Bastes nga gikahinabi sa Banat News miingon nga si Camacho nialigar nga siya maoy gipusil niadtong higayuna apan iyang nailog ang armas ug mibuto.

Gipadayag usab niini nga ni-surrender siya personal kang Bastes kini tungod kay iya kining permeng makita sa mga lokal nga telebisyon atol sa mga balita.

Dugang niini nga niadtong nilabay'ng barangay election milansar usab siya isip   kagawad sa ilang lugar uban sa naangol nga kagawad nga si Lamberto Capol apan napildi lang siya niini.

Si Camacho maoy gitumbok nga nakapusil patay kang Danilo Lato, 37, ug nakaangol kang kagawad Capol ingon man ngadto kang Raul Camanse, 44.

Si Camacho ug si Lato   nagkalalis dihang nagkainom niadtong Domingo sa kaadlawon atol sa tinuig nga pagsaulog sa pangilin sa ilang lugar hinungdan nga ni-resulta sa pagpamusil.

Nasayran nga ang kagawad nga si Capol dali untang nisusi sa maong hitabo apan gipusil naman hinuon sa suspetsado ug naigo sa iyang abaga.

Samtang ikatulong biktima nga si Yap nga nagtan-aw sa disco niadtong higayuna napagan usab kini nga naigo sa dughan ingon man bukobuko.

Ang tulo ka mga biktima gidali sa pagdala sa Danao District Hospital apan gibalhin gilayon sa Vicente Sotto Memorial Medical Center apan way swerte si Lato kay nakabsan sa kinabuhi samtang nagpadulong sa tambalanan.