Magdepende sa hepe ang pag-ban

Telebisyon diha sa mga police station usa sa mga source sa impormasyon sa mga polis sumala pa sa pipila ka mga opisyal ug magdepende na kini sa mga hepe nila kung sa pagtan-aw niini sa mga sakop dili na epektibo o ba kaha wala na magtrabaho og maayo gumikan sa telebisyon.

Si Sr. Supt. Patrocinio Comendador, director sa Cebu City Police Office mitug-an sa mga tigbalita kagahapon nga wala pa siya makadawat og direktiba kabahin niini apan misaad nga iyang sundon kung unsa may kamandoan.

Mipadayag si Comendador nga lahi sa ubang kampo sa militar ug sa kapolisan ang mga police stations lugar diin kadangpan sa mga tawo tungod kay kini pampublikong dapit apan magdepende nalang sa mga commander o hepe pagsusi kung nakaapekto ba gyud sa trabaho sa ilang mga sakop ang pagpunay og tan-aw og telebisyon.

Hinuon sa direktibang gipagawas ni PNP Director Avelino Razon wala mag-ingon nga tangtangon gyud ang telebisyon apan kinahanglang balita ra gyud ang ilang tan-awon kini aron dili maapektahan ang ilang serbisyo sa publiko.

Si Police Regional Office –7 Director Chief Supt. Ronald Roderos nagkanayon nga walay kaso kung dunay telebisyon diha sa police stations basta dili lang mag-apong ang desk officers sanglit sila may una gyung maduolan sa mga tawo.

Nakatabang usab hinuon ang telebisyon sa pag-entertain sa mga reklamante ug bisita sa police station samtang nagpaabot sa ilang mga transaksyon.

Si Comendador niadtong milabay'ng tuig mipatangtang sa telebisyon diha sa guardhouse sa gate sa CCPO tungod kay ang mga gwardiya mag-apong nalang sa telebisyon ug dili na gyud hinuon makabantay og maayo sa manulod ug mogawas diha sa maong kampo.(Edwin Ian Melecio)