Halapad nga demolisyon ipatuman

Halapad nga demolisyon sa mga panimalay sa dakbayan sa Sugbu ang gipaabot nga ipatuman sa mosunod nga mga adlaw.

Kasagaran niini giingong maapektahan sa pagsugod na og hawan sa siyudad sa three-meter-easement sa kasapaan ug kabaybayunan sa siyudad.

Ang Urban Poor Consultant sa City Hall nga si Gerry Marquez maoy morekomendar ngadto kang Mayor Tomas Osmeña sa i-demolish nga mga pinuy-anan.

Kini human usab sa iyang gipahigayon nga site inspection sa pipila ka mga dapit sa dakbayan nga gikatahong ubay-ubay ang mga illegal structures.

Nag-una niini mao ang giingong 13 ka mga panimalay diha sa dalan F. Rallos sa barangay Pasil ug laing upat ka mga panimalay diha sa F. Rallos sa habig sa barangay Suba.

Laing irekomendar ni Marquez ngadto sa mayor nga ipa-demolish mao ang 15 ka mga panimalay ilawom sa Tigbao bridge sa barangay Talamban nga giingong delikado sa mga pagbaha.

Samtang nalutsan na usab og demolition order ang 55 ka mga panimalay diha sa block 3 (seawall) sa barangay Suba.

Napirmahan na usab ni Osmeña ang demolition order sa kapin sa 40 ka mga panimalay nga anaa daplin sa sapa diha sa barangay Calamba.

Ang kamanduan giingong iduso na ngadto sa Squatters Prevention Encroachment and Elimination Division (SPEED) alang sa implimintasyon.

Miingon si Marquez nga dugang mga panimalay usab ang i-demolish diha sa barangay Calamba nga maapektahan sa tukurong satellite market sa siyudad.

Wala pa hinuon matino kun  ang tanang maapektahan sa demolisyon, mahatagan ba og relocation site sa kagamhanan sa dakbayan.

Apan gitataw ni Marquez nga ang himoong lakang sa city government, alang ra usab sa kaayuhan sa mga mulopyo nga nag-ungaw sa kakuyaw ilabina kung dunay mga pag-uwan.