Wa ka ugpo ang usa ka gituohang akyat bahay nga kawatan human masikop kagahapon sa alas 3:00 sa kaadlawon dihang nanglungkab sa usa ka tindahan duol sa may Doña Pepang Old Cemetery M. J. Cuenco barangay Tejero ning dakbayan.
Ang kasamtangang gitanggong sa Waterfront Police Station ug gikatakdang pasakaan og kaso karong adlawa, mao si Sandy Kier Sarabia, 19, temporayong nagpuyo sa sitio Abellana-Luyo barangay Mabolo ug lumad nga taga Ormoc City.
Ang suspetsado nasikop mismo sa tag-iya sa tindahan nga si Edgar Quiñones, 50, inabagan sa mga estambay sa maong lugar human sa pipila ka minutos nga ginukdanay.
Si SPO2 Ernesto Caballero sa Waterfront Police Station nga gikahinabi sa Banat News nagkanayon nga si Sarabia nabantayan sa tag-iya nga nanglungkab sa iyang tindahan kagahapon sa kaadlawon.
Ang suspetsado daling nakadagan apan tungod sa kasikas ug kamosyon nakabantay ang mga estambay ug maoy nakatabang sa tag-iya hinungdan nga nasikop ang suspetsado.
Nakuha sa possession niini ang usa ka .38 revolver nga snub nose uban sa tulo ka mga buhing bala ug ubay-ubay nga mga paninda nga wala pa matinong kantidad.