Sunog sa kapitolyo

Miulbo ang sunog diha sa second floor sa CFI Building nga maoy Legislative Building sa Capitol Compound kagahapon sa udto apan napawong kini dayon sa mga nagbantay nga guwardiya sa maong dapit.

Matud pang FO3 Antonio Gonzales imbestigador sa Cebu City Bureau of Fire Protection sa pakighinabi sa Banat News nagkanayon nga igo lang sila misiguro sa dapit nga wala nay nahabiling agipo ug baga diha sa second floor ug kisame sa third floor.

Gikatahong nagsugod ang kalayo diha sa control box sa gate valve sa tanang linya sa kuryente diha sa second floor nga gituohang ni-overheat ug maoy nakaingon sa pagkasunog sa mga wirings nga konektado niini.

Ang alarma sa sunog nadawat sa kabomberuhan alas 12:03 ug nakontrolar dayon sa mga guwardiya sulod sa tulo ka minutos, matud pang Gonzales ang nag-inusarang guwardiya nga nagbantay diha sa maong edipisyo nga si Gilbert Angkay kinsa nag-roving diha sa gawas niadtong tungura maoy nakabantay nga nag-aso na diha sa second floor.

Ang mga guwardiya sa Kapitolyo nga sila si Cristopher Castro, Angelito Delima, Ronilo Auxtero ug ang ilang head guard nga si Jessie Getorillas daling miresponde ug mitabang sa pagpatay sa kalayo gamit ang lima ka fire extinguishers ug ang ilang fire hose box ug “wet stand pipes.”

Matud pang Gonzales walay mga dokumentos o ba kaha mga mahalong butang nga nadaot sa insidente gawas lang sa mga PVC pipes ug ang control box ug gate valve lakip na ang mga sulod niining wirings.

Dugang na naguba mao ang kisame diha sa third floor nga gikinahanglang gub-on sa mga bombero aron malili diin gikan ang aso.

Gibana-bana sa kabomberuhan nga P10,000 lang ang danyos sa maong sunog.