Polis wa mabayri

Human sa dul-an na sa duha ka tuig og hinuwat sa usa ka police woman kinsa nadestino sa Talisay City police station nga bayaran siya sa nangutang kaniya apan hangtud karon wala gyud kini mobayad hinungdan nga ang biktima nakahukom na lang nga magpa-blotter ug mibahad nga mopasaka og kaso batok sa suspetsado.

Si PO3 Brenda Espina ang mipa-blotter sa milabay'ng adlaw kabahin sa insidente nga nahitabo niadtong Disyembre 13, 2006.

Ang suspetsado mao si Mary Ann Paquibot, hingkod ang panuigon, minyo, residente sa barangay Maghaway, dakbayan sa Talisay.

Base sa blotter nga si Paquibot ang miadto sa balay sa bayaw nga babaye ni Espina nga si Eleonor sa Camella Homes, barangay Lawaan I aron mohuwam og kwarta.

Gikasabotan ni Eleonor ug Paquibot nga ang huwaman sa suspetsado ang iuli niya sa sunod buwan lakip na ang tubo.

Si Eleonor ang mihangyo kang Espina nga mopagawas og P63 mil aron ipahuwam kang Paquibot.

Pagdawat ni Paquibot  sa maong kwarta gibilin pa niini ang iyang ATM card ngadto kang Eleonor para paghatag og kasigurohan nga mobayad gyud siya sa adlaw nga gikasabotan.

Apan hangtod karon si Paquibot ang wala pa gyud mobayad bisan pa sa mga demands sa biktima ngadto kaniya.

Si Espina ang mibahad nga moduso siya og kaso batok kang Paquibot kung dili pa gyud kini magpakita og bayad sa iyang gihuwaman nga salapi.