Usa ka taxi drayber nga nabulit sa samad dinunggaban sa iyang lawas ang nakamaneho pa sa iyang sakyanan paingon sa tambalanan human mabiktima sa pagpanunggab niadtong Biyernes sa gabii diha sa Tormis, Ext. barangay Sambag II ning dakbayan.
Samad sa ulo, nawong, buko-buko ug ubang parte sa lawas ang nahiaguman sa biktima nga si Alberto Mondido, 31, taga sitio Upper Pailob, sa nahisgutang lugar, samtang duha ka wala mailhing mga lalaki maoy nanunggab kaniya.
Sa imbestigasyon nila ni SPO4 Alex Manatad sa homicide section sa Cebu City Police Office ang biktima niasoy nga mga alas 9:15 sa gabii sa nahisgutang adlaw naglakaw siya paingon sa iyang taxi nga giparada sa maong dapit.
Ang mga lalaki kalit nga nibutho sa iyang giagian ug ang usa niini kalit lang nga nanumbag kaniya hinungdan nga nibawos usab siya niini.
Apan nagtinabangay na hinuon ang maong mga lalaki sa pagkulata kaniya ingon man sa pagdunggab makadaghang higayon. Hinuon ang biktima nakahimo pa kini sa pagsulod sa iyang taxi ug nakapadagan paingon sa Cebu City Medical Center (CCMC) samtang ang mga midunggab niini ang daling nakasibat.