Gitusak og bala

Nabulit  og samad  pinusilan ang kalawasan sa usa ka drayber sa habal-habal kinsa giluthang sa iyang kainom niadtong Biyernes sa alas 7:00 sa gabii didto sa Lower Tawog, Valladolid, Carcar.

Ang biktima  giila sa kapolisan nga si Rodel Quijano, 33,   taga Upper Tawog sa maong barangay  samtang ang suspetsado mao si Dexter Babao, alyas Atet, hingkod,  ug way klarong trabaho, taga Lower Tawog.

Matud pa ni SPO3 Raffy Satera sa Carcar Police Station nga nasugamak sa daghang samad pinusilan sa lawas ang biktima agi sa wa matinong kalibre sa armas.

Matud pa sa imbistigasyon sa kapolisan nga sa wala pa mahitabo ang pagpamusil, nagkalalis ang biktima ug ang suspetsado samtang nag-inom sa usa ka tindahan sa Lower Tawog.

Dihang miinit na og maayo ang lalis sa duha, milanit sa iyang armas de fuego ang suspetsado ug  gipusil si Quijano makadaghang higayon.

Gidala sa mga nakasaksi ang biktima ngadto sa  Jesus Paraz Memorial Hospital sa maong dakbayan, apan gumikan sa kagrabe sa mga samad gibalhin kini sa usa ka hospital sa Cebu City.

 Matud pa ni Satera nga dihang gisubay nila ang dapit nga nahitaboan, may nakuha ang kapolisan nga usa ka buhing bala sa .38 kalibre ug usa usab sa.357 kalibre nga  bala.