Gisungag sa patrol car

Laing aksidente na usab ang nasugatan sa mga sakop sa Mobile Patrol Group sa ilang Toyota Innova Patrol Car kagahapon sa kaadlawon diin usa ka multicab ang ilang nadumbulan diha sa Fuente Rotunda apan swerteng walay naangol.

Sumala pang SPO2 Apollo Matchacon sa pakighinabi sa Banat News ang maong patrolcar 007 nga may plakang SHN-889 gimaneho ni PO3 Jaime Aparre ug nagtubag og alarma.

Apan pag-abot diha sa atbang sa usa ka dakong mall sa maong dapit kalit niining nadumbulan ang luyong bahin sa nag-unang multicab van nga gimaneho ni Alberto Biaño, 36, nga taga dalan L. Tudtud sa barangay Mabolo.

Tungod sa kakusog sa pagdumbol nawagtangan og kontrol ang multicab ug nabalintong ngadto sa wala diha sa kalsada. Wala hinuoy naangol sa maong aksidente.

Ang maong patrolcar nakaangkon og kadaut diha sa atubangang bahin samtang naguba ang tuong bahin sa luyo sa multicab tungod sa pagdumbol.

Kini maoy ikaduhang aksidente sa maong mga patrolcars sa nahisgutang dapit human sa nahitabong pagsungag sa laing Innova niadtong milabay'ng bulan sa Nobiyembre diin duha ka magtiayon ang nangaangol dihang ang ilang Volkswagen nadasmagan.

Ang nangaangol niadtong hitaboa mao sila si Franz Villalonga ug asawang si Vanessa nga luwan sa ilang 1967 Volkswagen Beetle sa Fuente Osmeña Rotunda dihang kalit nadumbulan sa Toyota Innova patrol car 011 nga gimaneho ni PO1 Norman Patindol.

Ang maong patrolcar misugat sa traffic tungod sa paggukod sa duha ka mga lalaking armadong nagsakay og motorsiklo nga padulong sa dalan B.Rodriguez.

Si Chief Insp. Arnel Banzon, hepe sa Mobile Patrol Group sa pakighinabi sa Banat News nitug-an nga dunay himuon unyang imbestigasyong administratiba kabahin sa insidente apan adto niya kini isangon sa Criminal Investigation and Intelligence Branch o ba kaha sa Administrative Branch.

Samtang kabahin sa aksidente adto nalang sa Traffic Group.

Mao na kini ang ikapitong aksidente nga gikalambigitan sa Innova nga pinalit sa dakbayan sa Sugbu sukad niadtong Septembre 2006.