Kapitan gikulata

Usa ka barangay kapitan ang nakaangkon og mga bun-og sa kalawasan human kini kulataha sa mga lalaking ilang gidakop diha sulod sa usa ka diskohan sa lungsod sa Tabuelan niadtong Biyernes sa gabii.

Ang gikulata mao ang barangay kapitan sa Mabunao, Tabuelan nga giilang si Felix Ruben, 37, kinsa maoy nangulo sa pagsikop sa tulo ka mga lalaking dunay mga kutsilyo diha sulod sa maong diskohan.

Matud pa sa kapolisan unang mikulata sa biktima mao sila si Jury Caballero, 20, ug Rolando Purisima, 37, human ang ilang kauban nga si Renato Punay, 38, gidakop sa mga barangay tanod nga nagbantay sa maong diskohan tungod sa paghupot niini  og siyam ka pulgada nga kutsilyo.

Gikatahong nagmagahi si Punay dihang gisikop sa kapitan hinungdan nga misangpot kini sa panag-initay ug binunlutay hangtud nga miapil na ang mga kauban ni Punay paghamag sa kapitan.

Nasuta nga sila si Caballero ug Purisima mga residente  sa barangay Kanlim-ao, Tabuelan samtang si Punay taga barangay Tapilon, Daanbantayan.

Si Mabunao chief tanod Romeo Dungog kinsa nakakita sa nahitabo sa kapitan daling miduol ug mitabang sa pagsikop sa tulo inubanan na sa ubang mga tanod.

Nasuta usab nga giingong hubog na ang tulo sa bino niadtong tungura dihang nahitabo ang kagubot.

Ang tulo gitanggong na sa Tabuelan  police station sa Tabuelan aron sa pagpasaka og kasong paghupot og mahait nga hinagiban batok kang Punay ug kasong direct assault usab ang ipasaka batok nila ni Purisima ug Caballero.