"Mamasang," 2 bugaw na-entrap sa motel

Usa ka mamasang ingon man duha ka bugaw ang nasikop sa mga sakop sa Criminal Investigation and Intelligence Braneh kagahapon sa kaadlawon sulod sa usa ka lawak sa motel nga nahimutang sa Gen.  Maxilom ning dakbayan.

Ang   tulo nasikop sulod sa  motel human mobaligya sa lima ka mga babaye diin duha niini ang nasutang mga menor de edad.

Si  Sr. Insp. George Ylanan, hepe sa CIIB maoy nangulo sa maong malampusong operasyon sa pakig-alayon sa usa ka  Non-Government Organization (NGO’s).

Unang nasikop sa grupo mga ala 1:00 sa kaadlawon sulod sa room 24 sa maong motel mao ang “mamasang” nga si Shirley Casio, 40, nga taga Kamagayan human maoy nidala sa duha ka mga mugbog lupad ngadto sa duha ka police decoy nga nagpakaaron-ingnong kustomer o sa kantidad nga tag P500.

Samtang nasikop usab mga alas 2:00 kagahapong adlawa sa samang lawak ang duha ka bugaw nga sila si Joseph Arganda, 40, taga Tagonol, Pardo ug Fredie Anabia, 25, taga Baracks barangay Luz ning dakbayan, human mobaligya sa tulo ka mga babaye sa tag P500   matag usa.

Nakuha  gikan kanila  sa mga suspetsdo ang mobalor sa P2,500  nga tagsa ka gatos ka pesos isip buy bust money atol sa maong operation.

Ang tulo  pasakaan og kasong kalapasan sa R.A 9208 o Trafficking of Person ug kasamtangang gitanggong  sa karsel sa Cebu City Police Office.

Ang akusado nga si Anabia nga gikahinabi sa Banat News nihimakak nga usa siya ka bugaw ug nipadayag nga gi-hunongan lang siya sa kustomer nga nag-awto nga nangita’g babaye.

Hinungdan nga nangayo usab siya'g panabang sa iyang higala nga si Joseph ug maoy nagkuha’g babaye diha sa Kamagayan ug ilang gihatud sa maong motel.

Ang mga babaye tua na karon sa poder sa Department of Social Welfare and Developmet (DSWD).

Si Ylanan nga nahinabi sa Banat News nipadayag nga ikatulo na nilang higayon nga nakasikop sa samang operation isip abag sa maong NGO’s.

Nunot niining ilang subsob nga pagpanakop na-minimize ang maong matang sa kalihukan dinhi sa dakbayan diin sagad mabiktima kadtong mga menor de edad nga mangita’g trabaho gikan sa laing probinsya.