Patong-patong kaso vs tulisan

Magpatong-patong unya ang kaso sa naangol nga gipasanginlang tulisan sa bangko diha sa dakbayan sa Carcar human kini positibong giila sa mga testigos sa Mactan Rural Bank nga gitulis niadtong bulan sa Enero ug ingon man ang pag-amendar sa Carcar police sa kasong robbery ngadto na sa robbery with homicide ug direct assault in person of authority.

Si Supt. Teofilo Siclot,  hepe sa Carcar police station mitug-an sa mga tigbalita nga duna sila'y nabasahang kaso kaniadto nga diin ang kasong robbery basta dunay mamatay atol sa operasyon adto tanan ipasangil sa mga suspek nga nahabilin ug ning tungura mao si Recoly Igoy, 22.

Si Igoy nasamdan atol sa engkwentro tali sa mga polis sa Carcar niadtong milabay'ng Lunes human nila gikatahong gitulis ang Rural Bank of Cebu South Inc. sa barangay Poblacion II sa maong siyudad.

Napatay usab sa maong hitabo ang iyang kauban nga si Nelson Gutierrez niadtong tungura. Dunay mga pagdudang ang nagpaluyo kanila mao si Roy Fernandez nga notoryos nga kidnap for ransom personality sa Metro Manila.

Si Igoy napasakaan na og kasong robbery niadtong milabay'ng Martes sa hapon apan matud pang Sr. Supt. Carmelo Valmoria, director sa provincial police nga amendahan nila ang kaso ngadto na sa robbery with homicide tungod sa kamatayon ni Gutierrez ug ingon man ang direct assault.

Kini nalatid sa special complex crime of robbery with homicide base sa Article 294 sa Revised Penal Code.

Matud pang Valmoria ning paagiha dili mamahimong makapiyansa si Igoy alang sa temporaryo niining kagawasan.

Samtang giestablisar pa karon sa Carcar police ang tinuuray nga pagkatawo sa tulo ka mga lalaking milili sa narekober nga kolor metallic green nga awto diha sa usa ka mall duha ka kilometro gikan sa crime scene nga nasutang iya ni Gutierrez ug ang ilang koneksyon sa maong pagpanulis.

Dunay nakuhang impormasyon ang Cebu City Police Office nga usa sa maong mga lalaki mao si Fernandez base usab sa pag-ila sa mga tawo sa palibot diha sa litratong ilang gipakita.

Dako usab ang pagtuo ni Valmoria nga dako og impact sa grupo ni Fernandez ang nahitabo sa ilang duha ka sakop apan magpadayon ang panggukod nila sa tanang mga grupo niini.

Samtang ang kanhi tag-iya sa awto nga napalit ni Gutierrez nga si Edward Gonzaga nga taga barangay Cubacub sa dakbayan sa Mandaue gi-clear na sa Carcar police human kini makapakita og mga papeles ug dokumento nga napalit gyud kini ni Gutierrez gikan kaniya.

Matud pang Siclot base sa record ni Gonzaga negosyante gyud kini og buy and sell sama sa mga sakyanan.

Si Igoy duna nay commitment order alang sa Bureau of Jail Management and Penology sa Carcar City Jail ug gitugutan na sa mga doktor nga mahimo nga isulod sa bilanggoan.