Drugas hinungdan sa pamusil

Naglambigit sa ilegal nga drugas ang anggulo nga gisusi sa kapolisan sa nahitabong pagpusil patay sa usa ka 23 anyos nga bayot sa Sitio Riverside Poblacion Oriental sa miaging adlaw.

Kini ang nasayran sa Banat News sa follow up nga gihimo kagahapon sa kapolisan sa maong lungsod.

Si SPO2 Romulo Sasing nga nahinabi sa Banat News miingon nga subay sa gihimo nilang imbestigasyon nasuta nga ang namatay nga si Randy Cawog Susalijo nasaypan lang sa mga mamumuno.

Dugang pa niya nga gituohan nga ang uyoan sa namatay nga usa usab ka bayot maoy target sa mga mamumuno ug naatol lang nga niadtong higayona nga gisaka ang panimalay maoy naabtan nga naghigda si Susalijo.

Si SPO2 Sasing miingon nga igo lang mibanos sa paghigda si Susalijo sa maong higdaanan nga maoy katulganan sa uyoan sa panahon sa kahaponon.

Gitataw niya nga ang uyoan ni Susalijo   ilang gituohan nga nalambigit sa ilegal nga drugas sa maong dapit ug napagan lang ang namatay.

Sa nasayran nga si Randy Susalijo gipusil sa ulo sa  duha ka mga nagmaskara mga  lalaki kinsa dali usab nga mipahilayo sa maong dapit.