Lalaki misud og balay nanigbas, natigbasan

Usa ka lalaki kinsa giingong hubog misulod sa balay sa ilang silingan ug nanigbas apan natigbasan usab niadtong Huwebes sa buntag sa barangay Cansojong, dakbayan sa Talisay.

Ang biktima mao si Bridgette Dabasol, 18, ulitawo, residente sa maong lugar  kinsa nakaangkon og samad tinigbasan sa iyang walang pulso, tuong tudlo ug walang paa ang daling gidala sa Talisay District Hospital.

Ang suspetsado mao si Pedro Padillo, 32, silingan ni Dabasol kinsa nakaangkon usab og samad tinigbasan sa ulo ug walang dunggan human kini tigbasa usab sa maguwang ni Dabasol nga si Arnel. Gidala kini sa Talisay ug nagtingkagol sa Talisay detention cell uban kang Arnel.

Base sa taho nga si Padillo giingong hubog ug mipugos og sulod sa balay sa mga Dabasol ug dihang nakasulod na kini kalit lang gitigbas niini si Bridgette hinungdan nga nahitabo ang linayogay.

Naabot si Arnel ug mitabang kini og ilog sa sundang nga gidala ni Padillo ug nabawian gyud hinungdan nga natigbasan usab kini.

Si Padillo giingong mikaratil og dagan sa kahadlok.

Apan si Padillo ug Bridgette nagkaabot sa nahisgutang tambalanan.

Si Bridgette mitumbok kang Padillo nga mitigbas kaniya ug si Padillo usab ang mireklamo ngadto sa mga polis ug nagpa-blotter ug mitumbok kang Arnel nga mitigbas usab kaniya hinungdan nga siya ug si Arnel ang nagtingkagol karon sa detention cell. (Brenda D. Batuto)