Tomas gilaay sa sistema sa NFA

Gilaay na si Mayor Tomas Osmeña og pinaabot sa paghatag og pagtugot sa National Food Authority (NFA) nga maka-distribute og NFA rice ang Cebu City Hall ngadto sa kabarangayan.

Partikular nga hatagan sa City Hall og access niini mao ang mga bukirang barangay sa dakbayan nga giingong maglisod pagpalit sa baratong bugas.

Ang mayor nisaway na sa proseso sa NFA tungod sa giingong kadaghan niini  og gikinahanglan aron ang siyudad mahatagan og lisensya sa nahisgutang ahensya.

Usa sa mga rekisitos nga gikinahanglan sa NFA mao ang listahan sa 250 ka tawo sa matag barangay nga maoy makapalit sa NFA rice.

Gusto ni Osmeña nga ma-distribute na ang baratong bugas sa kabarangayan samtang ang dakbayan padayong mohikay sa mga gikinahanglan.

“We need immediate release, the City will take care of the transportation, we will even sell at cost, I don’t care if we will spend money just to distribute,” sumala sa mayor.

Ang maong problema gipadangat na ni Osmeña ngadto kang Presidente Gloria Macapagal Arroyo atol sa pagduaw sa presidente sa Sugbu.

Gani gihulagway sa mayor ang presidente mismo nauwaw sa iyang gipadangat nga problema ug nimando sa usa ka opisyal sa NFA pag-adto sa Malakanyang.

Sa pikas bahin, nagplano usab si Osmeña nga makighinabi kang Agriculture Secretary Arthur Yap aron ipadangat ang maong problema ingon man ang tinguha sa siyudad.

Gitataw sa mayor nga nag-antos nang daan sa malnutrisyon ang mga molupyo sa pipila ka bukirang barangay sa dakbayan ug dili na angayang dugangan ang kalisod niini.

“In Buot-Taup they are already suffering from malnutrition even without the crisis, karon pa!” dugang pamahayag ni mayor Osmeña.

Sa kasamtangan niingon ang mayor nga padayong nituman ang kagamhanan sa dakbayan sa mga rekisitos nga gipangayo sa NFA alang sa rice distribution.

Ang Department of Social Welfare and Services (DSWS) sa City Hall maoy gisangunan ni Osmeña nga maoy muhikay sa tanang gikinahanglan.