Custom broker gipusil

Nakalingkawas sa tinong kamatayon ang usa ka custom broker human pusila sa duha ka nagmotorsiklo kagahapon sa buntag diha sa iyang buhatan sa kanhi WG&A building., S. Osmeña St., North Reclamation area barangay Mabolo.

Ang nalandig sa Perpetual Succour Hospital   giila sa kapulisan nga si Leonardo Refuelo Abay-Abay, 42, ug tag-iya sa LRA Customs Brokerage, residente sa Garden Ridge Cabangcalan dakbayan sa Mandaue.

Samtang ang mga suspetsado duha ka mga lalaki nga nagsakay  og  usa ka motorsiklo, nagsul-ob  og  itom nga jacket ingon man itom nga purol.

Sa gipahigayong imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office ang biktima niasoy nga sa iyang paghiabot sa maong lugar mga alas 9:10 sa buntag kagahapon ang iyang ig-agaw nga si Jerome Miel Abay-Abay, 40, iya kining gisugo pagdala sa iyang bag ug mga butang sa iyang opisina nga tua mahimutang sa 3rd floor sa nahisgutang building.

Naglakaw ang biktima kilid sa maong edipisyo aron susihon   ang bag-ong site diin iyang tukuran og bag-ong opisina diha sa ground floor.

Apan sa dihang nagbarog na siya daplin sa dalan sa nahisgutang building gipusil siya sa  likod ug nahagba, ang suspetsado dali kaayong nakadagan paingon sa usa ka motorsiklo nga nagpaabot nang daan niini uban sa wala mailhing driver.

Samtang ang biktima gidali usab sa pagdala sa tambalanan ug nagpaalim pa hangtud ning mga higayuna.

Si Cebu City Police Office Chief Patrocinio Comendador nga gikahinabi sa mga tigbalita nipadayag nga duha ka mga anggulo karon ang gitutukan sa kapulisan labot sa maong krimen.

Matud pa niini nga ila karong gitan-aw ang posibilidad nga related ang maong kaso sa trabaho sa biktima isip Custom  broker ingon man ang pagka-negosyante niini ug personal nga motibo.